Sama søgan
mánadagur 19. mars 2018
2. UMFAR: Somu trý liðini, sum vunnu sínar dystir í 1. umfari, vunnu aftur í 2. umfari, og eftirsum eitt nakað skert HB-lið aftur skoraði mest, hildu tær reyð-svørtu fast um 1. plássið.
Øll trý toppliðini høvdu heimavøll í 2. umfari, hóast Gundadalur reint tekniskt eisini er heimavøllur hjá B36. Heimaliðini gjørdu slætt borð og vístu einki gestablídni, tá øll mótstøðuliðini vórðu send heim við ongum stigi og ongum máli!
Hóast HB mátti vera 8(!) av sínum vanligu leikarum fyriuttan (námsferð og sjúka) – harav fýra, sum byrjaðu inni í 1. umfari, m.a. landsliðsleikararnir Sarita Mittfoss og Rebekka Benbakoura – so gjørdu grannarnir úr B36 einki við nýggja toppliðið, sum vann 5-0. Sjálvt spælið hjá hjá HB var einki at reypa av, men B36 hevur bara ikki (skjótar) álopsprofilar sum Milju Simonsen og Heidi Sevdal, sum gjørdu stóran mun fyri skerda HB-liðið. Simona Heinesen í HB-málinum hevði lítið og einki at gera í mun til B36-málverjan, Jónu Nicolajsen, sum spældi ein góðan dyst og var við til avmarka tapið. Sigurin kundi verið størri, men í HB-leguni vóru tey væl nøgd skilst, tí við hesum sigrinum halda tey fast um 1. plássið.
Hinir favorittarnir KÍ og EBS/Skála vunnu eisini tryggar sigrar, hóast teir ikki vóru so stórir. KÍ hevur mangan vunnið meira enn “bara” 3-0 móti B68, men sigurin var ongantíð í vanda, hetta hóast toppskjútti teirra, Maria Thomsen, ikki var við, og at venjarin valdi at royna nakrar av teimum heilt ungu frá byrjan. Vandamikli superveteranurin, Rannvá Andreassen, vísti tó, at hon ikki hevur gloymt, hvar málið stendur!
EBS/Skála baksaði seg til ein góðan 2-0 sigur við Margáir. Tær upplivdu eins og KÍ í fyrsta umfari, at ÍF/Víkingur er eitt sterkari lið í ár enn í fjør. Dysturin var rímuliga javnur, og ÍF/Víkingur lá meira enn so framvið at skora eisini, men tá avtornaði, lukkaðist hetta bara fyri meistararnar, sum alt í alt vunnu uppiborið. Bæði liðini máttu vera ein sterkan miðvallara fyriuttan: Fríðrún Olsen, EBS/Skála, og Jensa Tórolvsdóttir, ÍF/Víkingur.
Samanumtikið var einki óvæntað úrslit í Betri Deildini fyrstu tvey umførini , og HB hevur livað upp til favorittheitið, sum hini liðini hava hug at geva teimum. Næsta sunnudag fæst ein greiðari ábending um, hvar HB flýtur í mun til hinar báðar FM-biðlarnar, EBS/Skála og KÍ, tí tá skal HB ein túr norður til Margáir at vitja greipuvinnararnar, og tá eru bæði toppliðini helst fullmannaði aftur.
FSF sigur seg raðfesta kvinnufótbóltin hægri nú, so tað er kanska ikki ov nógv at vænta sær, at toppdysturin við Margáir verður stroymdur? Ella fleiri kvinnudystir yvirhøvur?
Í øðrum umfari fingu aftur fýra ungir leikarar sínar fyrstu minuttir í bestu deildini:
Krista Hellisfoss (16), EBS/Skála (FaroeSoccer manglar eina andlitsmynd!)
Eyð Knudsen (15), B68 (FaroeSoccer manglar eina andlitsmynd!)
Lena Maria Joensen (15), KÍ
Rutt Gregersen, KÍ (FaroeSoccer manglar eina andlitsmynd!)
HB, B36 og ÍF/Víkingur hava higartil ikki roynt nakran nýggjan leikara.
Dystirnir í 3. umfari sunnudagin 25. mars eru hesir:
EBS/Skála - HB við Margáir kl. 16:00
B36 - KÍ í Gundadali kl. 14:00
ÍF/Víkingur - B68 í Sarpugerði kl. 16:00
