Espa�ol English F�royskt

U21-kappingin klár

fríggjadagur 21. februar 2020
FSF boðaði í gjár frá, at U21-kappingin er løgd á comet, og FaroeSoccer hevur ikki ligið á boðunum og hevur lagt kappingina á netið. 14 U21 lið hava teknað seg til kappingina, sum er skipað eftir sama leisti sum í fjør.

U21-kappingin er eins og í fjør skipað í tveir bólkar: A-bólkurin spælir um FM, meðan tað er verri at fáa eyga á, hvat B-bólkurin spælir um, men eitt steyp verður nokk latið vinnaranum eins og í fjør skilst.

Í FM-bólkinum eru 5 lið: 07 Vestur, B36, HB, KÍa og NSÍ.
Í B-bólkinum eru 9 lið: AB, B71, EB/Streymur, FC Hoyvík, ÍF, KÍb, Skála, Undrið, Víkingur.

Tað kann tykjast eitt sindur løgið, at stór feløg sum eitt nú AB (FM-vinnarar fyrraárið) og Víkingur ikki hava nakrar FM-ambitiónir, men feløgini munnu nokk heldur satsa upp á at brúka og menna sínar U21-leikarar í 1. deild. Merkisvert – og keðiligt – er eisini, at Suðuroyggin einki lið hevur við í ár.

Tað hevur yvirhøvur verið tungt hoyggj hjá FaroeSoccer at skráseta U21-dystirnar. Tað er sera trupult at fylgja við í U21-kappingini, tí tað er ikki meira enn tað hendir, at dystir verða leiktir ásetta dagin ella ásettu tíðina við ásettum dómarum. Feløg møta ikki til dystir ella taka seg úr ella verða koyrd úr kappingini.

U21 brúkar eisini flúgvanndi útskifting, og hetta er ofta ein avbjóðing at skráseta hjá dómarunum (og tískil eisini hjá FaroeSoccer).

Harafturat hevur tað tíverri eisini víst seg at vera ov lætt at snýta við dómaraseðlunum. Skilt á tann hátt, at feløg í manningarneyð stundum brúka ólógligar leikarar, tvs. leikarar sum ikki eru limir í felagnum (og sum harafturat kanska eru ov ungir ella ov gamlir) og tískil ikki skrásettir í comet-skipanini. Tá verður bara onkur annar tøkur leikari í comet-skipanini valdur. Liðini vita aloftast, tá slíkt gongur fyri seg, men um tey vinna og fáa 3 stig (tað er tað vanliga) og fáa avgreitt dystin, so tíma tey ikki at gera meira við tað.

FaroeSoccer kann av góðum orsøkum ikki siga, um hetta er vanligt í yngru deildunum eisini, tí vit skráseta ikki hesar kappingar, men tað skuldi ikki undrað. Vónandi fara dómarar og FSF at taka hetta í størri álvara. Um dystir ikki kunnu avgreiðast uttan snýt ella óreglusemi, hvat er so endamálið við teimum? Fyri FaroeSoccer er tað keðiligt at skráseta tilætlað snýt, tí tá eru hagtølini ikki eftirfarandi.

FaroeSoccer ynskir annars øllum liðunum góða kapping, og vit fara at fylgja við og skráseta sum frægast - og skjótast tilber. Vit vóna og vænta sama góða samstarvið við dómarar og feløg.

U21-kappingin byrjar 9. mars.

Vit spæla saman!

comments powered by Disqus