Tað lækkar móti endanum...

Tað lækkar alvorliga móti endanum í landskappingini, og eitt nú eru kappingarnar í 2. og 3. deild hjá monnum longu liðugt avgreiddar.

Effodeildin fær sum vera man altíð størstu umrøðuna millum fótbóltsáhugað, og serliga er tað FM-stríðið, Evropaplássini og niðurflytingin, sum fyllir nógv. FM-vinnarin er ikki funnin enn, men evropaplássini ERU avgreidd, tey fara til Víking, B36, KÍ og NSÍ – júst somu lið sum í fjør.

Hóast 07 Vestur á pappírinum er flutt niður saman við ÍF, so er ikki vist, at tað verður dapri endin í effodeildini hjá uppflytarunum úr Vágum allíkavæl. Hetta veldst alt um, hvørt B68 klárar at hála seg longur upp enn núverandi 4. plássið í 1. deild. Reglurnar fyri uppflyting eru nevniliga so, at einki lið kann flyta upp, sum endar aftanfyri bronsuplássið.

AB hevur longu vunnið 1. deild, og teir næstbestu hjá Víkingi og KÍ liggja best til silvurið og bronsuna. Toftamenn KUNNU við einum góðum endaspurti framvegis náa játtaða effolandið, men í løtuni hava Víkingur og KÍ at síggja til bestu kortini á hondini at forpurra hesum.

UM B68 ikki megnar at flyta upp, so er hetta fyrstu ferð, síðani núverandi upp- og niðurflytingarleistur varð innførdur í 2006, at bara eitt lið flytir upp í bestu deildina.

Í hinum endanum í 1. deild er tó greitt, at tvey lið flyta niður í 2. deild, og tey eru ÍF og B36 – júst somu liðini, sum fluttu upp í fjør, tað hendir ikki ofta.

Tey nýggju liðini í 1. deild komandi ár verða B71 og teir næstbestu hjá Skála. B71 var ein rímuliga tryggur vinnari, meðan Skála ikki vann sær uppflytingina fyrrenn á seinasta leikdegi í harðari kapping við annað lið hjá EB/Streymi.

Í botninum í 2. deild hendi tað, sum møguliga fer at henda í effodeildini, at bara eitt lið flutti niður. Triðja lið hjá TB/FCS/Royn flytir niður í 3. deild, meðan annað lið hjá B68 á næstaftasta plássi bjargar sær, tí bara vinnarin av 3. deild, Undrið, flytir upp. Nummar 2 og 3 í 3. deild, 07 Vestur og KÍ, hava longu lið í 2. deild, so tey kunnu ikki flyta upp.

At bara eitt lið flytur upp úr 3. deild (og 2. deild) er heldur ikki hent síðani 2006.

Men hetta við at færri lið flyta upp/niður, er allarhelst nakað, vit mugu venja okkum við, nú feløgini fækkast, og um hildið verður á við sama kappingarleisti í trimum teimum bestu deildunum.

Hjá kvinnunum snýr alt seg um FM – og samstundis evropaluttøku, og nærum fyri fyrstu ferð síðani 2000 er veruligur vandi – ella møguleiki – fyri, at tað verður eitt annað lið enn KÍ, ið fer avstað við gullinum. Heimsmetið hjá óføru klaksvíkskvinnunum verður kanska ikki útbygt, nú seinasta umfar verður spælt í vikuskiftinum.

Klokkan 12:30 nú leygardagin bresta EBS/Skála og KÍ saman á Hólmanum á Eiði í ársins dysti. EBS/Streymur hevur fyrimunin á pappírinum, tí tær eru tvey stig frammanfyri KÍ, og skulu tískil bara hava ein javnleik fyri at vinna FM, meðan KÍ skal vinna! Ongin favorittur er til hendan dystin, sum FSF vónandi fer at stroyma.

Niðurflyting er sum vanligt ikki á skránni í bestu kvinnudeldini, so B68-kvinnurnar missa ikki svøvnin á aftasta plássinum. Vónin er støðugt at víðka um deildina, sum ikki hevur talt meira enn seks lið seinastu fýra árini. Við tað at 2. deild hjá kvinnum ikki spælir á heilum vølli, so er eingin automatisk uppflyting.