Espa�ol English F�royskt

Væntaðu sigrarnir komu í hús

mikudagur 14. mars 2018
1. UMFAR: Kuldi og regn foraði ikki meistarunum úr EBS/Skála at koma væl frá landi í ársins fyrsta dysti, tá tær lættliga settu B36 upp á pláss í Gundadali. KÍ og HB gjørdu eisini sína skyldu. Øll liðini hava nú verið í dysti, og alt gekk sum væntað.

Man skal nokk vara seg eitt sindur at staðfesta alt ov nógv eftir bert eitt umfar, men tað eru nógv tekin í sól og mána um, at gongdin í bestu kvinnudeildini verður, sum tey flestu hava spátt, nevniliga at deildin fer at ganga í tvíningum, har EBS/Skála, KÍ og HB fara at mynda toppin (og spæla um FM), meðan hini trý liðini fyri tað mesta fara at stríðast sínámilum fyri at sleppa undan niðasta plássinum (sum ikki hevur niðurflyting við sær allíkavæl).

Tá tað er sagt, so tykist sum ÍF/Víkingur er eina tonn betri enn B36 og B68, tí í KÍ vóru tær sera væl nøgdar at fara heim við trimum stigum úr Sarpugerði sunnudagin eftir ein tepran 2-1 sigur. ÍF/Víkingur hevur fingið meira rutinu inn á liðið og spældi ein góðan dyst og kundi væl havt fingið stig burturúr, men klaksvíkingar vóru dugnaligar og drúgvar sum vanligt. Tað skuldi ikki undrað, um ÍF/Víkingur fer at arga ovaru liðini av og á gjøgnum kappingarárið.

Hinvegin gjørdi B68 einki við HB á Toftum, og B36 hevði heldur ongan kjans móti meistarunum EBS/Skála á ovara vølli í Gundadali, her var tað bara ein spurningur um støddina á sigrunum. HB vann 8-1 og EBS/Skála vann 6-0, og Heidi Sevdal hjá HB legði seg beinanvegin fremst á toppskoraralistanum við sínum 5 málum á Toftum.

Fýra leikarar fingu sínar fyrstu minuttir í Betri Deildini. Hesar eru allar blaðungar (15):
Lena Olsen, B68
Lív Venned, B68 (FS manglar eina andlitsmynd!)
Birita Ryan, KÍ
Eydna á Bø, EBS/Skála (FS manglar eina andlitsmynd!)

Fleiri aðrar ungar sótu á beinkinum í fyrsta umfari, sum ikki hava roynt seg í bestu deildini áður, men teirra møguleiki kemur nokk.

Tað verður nokk ikki fyrrenn í 3. umfari 25. mars, vit fara at fáa eina ábending um, um HB veruliga megnar at blanda seg upp í FM-stríðið í ár, tá tær skulu út um bøgarðin at møta meistarunum. At døma eftir dystinum móti B36 er EBS/Skála framvegis eitt sera sterkt lið.

Næsta umfar hjá kvinnunum er nú sunnudagin 18. mars:
HB - B36 á ovara vølli í Gundadali kl. 17:15
EBS/Skála - Víkingur í Streymnesi kl. 15:00
KÍ - B68 í Klaksvík kl. 17:00

comments powered by Disqus
Kunning um dagføring av dystum á FaroeSoccer
Til allar brúkarar okkara

Allir dómaraseðlar á FaroeSoccer frá heimligu kappingunum verða vístir við loyvi frá FSF. Síðani 2017 eru allir dómaraseðlar skrásettir elektroniskt í Comet-skipanini hjá FSF, sum FaroeSoccer hevur atgongd til.

Hetta merkir, at tað ber illa til hjá FaroeSoccer at leggja øll fakta frá einum dysti út, áðrenn dómarin er liðugur at skráseta dystin í Comet, og tað hendir tíverri verri enn so altíð beint eftir leiklok. 

Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.


Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í Comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2019